रिंगण! सुटता तुटेना माऊली..

रिंगण! आज घरातल्या देव्हाऱ्यात एकलाच उभा पांडुरंग बघून मकरंद माने दिग्दर्शित 'रिंगण' ची आठवण आली. अर्जुन मगर (शशांक शेंडे) आणि त्याचा मुलगा अभिमन्यू (साहील जोशी) या बापलेकाची कथा.

 दुष्काळाने कर्जाच्या ओझ्यात पिचलेला शेतकरी, त्यात गहाण गेलेली जमीन. आत्महत्येचे सततचे विचार झटकून, पोरासोबत पंढरपूराला जातो. पोराची आई देवाच्या गावाला गेली असं सांगितल्यामुळे, इथे माझी आई सापडेल अशी आशा घेऊन आलेला 7-8 वर्षाचा त्याचा मुलगा. निराशेतून आत्मविश्वासाने, श्रद्धेने सकारात्मक मार्ग दाखवणारा 'रिंगण'.

 बापलेकाचे नाजूक नाते, पापभिरू निष्पाप अर्जुन मगर आणि त्याचा निरागस मुलगा अभिमन्यू पंढरीच्या गावी तरी काही पदरी पडेल का अशी आशा करत आलेले असतात त्यांची कथा. पंढरपूरला वारीला रिंगण सोहळे असतात त्यामुळे तर हे नाव साजेसे आहेच पण आपण ज्याला चमत्काराच्या अपेक्षेने शोधत फिरतो, तो कुठे ना कुठं आपल्या सोबत निरनिराळ्या रूपात सकारात्मकता देऊन जातो. आपल्या मातीशी सुरू झालेला प्रवास पुन्हा आपल्या मातीशी नेऊन पोहोचवतो असे रिंगण. आपल्याजवळ जे नाही त्या पळत्याच्या पाठी धावता आपण हातचं सोडत जातो हे आपल्याला कळतंच नाही, हेही यातून उमगते. 

शशांक शेंडे आणि साहिल जोशी दोघेही या सिनेमाचे हिरो आहेत. कमाल नैसर्गिक अभिनय. कुठेही ओढून ताणून काही नाही. दुष्काळाने ग्रासलेला शेतकरी ज्याला मुलालाही सांभाळायचे आहे, आणि त्याच्या साठी तरी आत्महत्येचा विचार झटकून तो एक मार्ग धरतो. वाटेत काटे नाहीत असं नाही, पण आजवर इतकी दुःख बघितली तर बघू चालून हाही मार्ग, असा बाप शशांक शेंडेनी खूपच उत्कटतेने साकारला आहे. कधी देवाच्या गावातही सामान लुटल्या गेल्याने, कधी परक्या गावात मुलगा हरवल्याने गांगारलेला बाप, मुलाशी मित्रासारखं लहान होऊन खेळणारा बाप, 'आई' चा हट्ट धरणाऱ्या मुलावर चिडणारा बाप सगळ्या भावना काळजाला भिडणाऱ्या. दुसरीकडे आपले छोटे भिडूही काही कमी नाहीत. साहिल जोशीचा चेहऱ्यावरचे हावभावही लाजवाब. इतका निरागस, इतका बोलका. खूप सुरेख. सहकलाकरांचे कामही छान. रोहित नागभिडे यांचे चित्रपट संगीतही साजरं!

मलाही मग आज कळलं, देव्हाऱ्यात रुक्मिणी नाही याचं वाईट वाटून घेण्यापेक्षा, माझ्याकडे विठूमाऊली आहे याचा आनंद कितीतरी पटीने जास्त आहे. अनेक पुरस्कारांची बरसात झालेला, सर्वोत्कृष्ट मराठी राष्ट्रीय पुरस्काराने सन्मानित असा रिंगण बनवताना आणि प्रदर्शित करताना  मात्र लेखक, दिग्दर्शक मकरंद मानेचे कष्ट पाहता, ते प्रेक्षकांशी पोहोचल्यावर सफळ संपूर्ण असेच म्हणावं लागेल. नेटफलिक्स वर आलाय. नक्की बघा. रिंगण. प्रयत्नांनी सुटेल, आत्मविश्वासाने तुटेल...

- रमा